سليم حسن

 سليم حسن (15 ابريل 1886 - 29 سبتمبر 1961) يعتبر من الرواد الاوائل من المؤرخين المصريين اللى اهتمو بالتاريخ المصري القديم و تاريخ مصر الفرعونية. ارتبط اسم سليم حسن بالتاريخ المصري بشكل كبير.

سليم حسن اتولد فى قرية ميت ناجي بمركز ميت غمر التابعين لمحافظة الدقهلية فى 15 ابريل 1886. اتوفي أبوه و هو صغير فاهتمت بيه امه و اهتمت بتعليمه. و بعد الابتدائية و الثانوية دخل مدرسة المعلمين الخديوية و انضم لقسم علم الاثار بالمدرسة.

اتخرج من مدرسة المعلمين سنة 1912 و اشتغل مدرس تاريخ و لغه انجليزى فى المدرسة الناصريه فى القاهره و منها اشتغل فى مدرسة طنطا الثانويه و بعدين اتنقل اسيوط و فى الاخر رجع تانى المدرسهالخديويه الثانويه فى القاهره.

رغم سنه الصغير فى الوقت ده الا انه كان مجتهد جدا و متعطش للعلم و التاريخ و ده اللى خلاه يشترك فى وضع كتب التاريخ اللى كانت مقررة علي طلبة المدارس فى الوقت ده.

سليم حسن كان دايما عنده امنية واحدة و هى انه يشتغل فى المتحف المصري. للاسف حاول كتير بس ما قدرش لان الاجانب كانت سيطرتهم قوية فى الوقت ده. الوضع ده ما استمرش كتير لغاية ما قامت ثورة 1919 اللى ادت استقلالية اكتر للوزراء المصريين. فى الوقت ده اتعين سليم حسن امين مساعد فى المتحف المصري بعد اصرار احمد شفيق باشا وزير الاشغال فى الوقت ده علي تعيين مصريين فى المتحف مع الفرنسويين اللى كانوا موجودين و ده كان سنة 1921.

فى سنة 1922 تم اكتشاف مقبرة توت عنخ امون و اندهش العالم كله للااكتشاف ده و زاد الاهتمام بالحضارة المصرية. زاد اعتزاز المصريين و فخرهم بمصريتهم. و بدأت مصر تبعت بعثات دراسة الاثار لاوروبا و طبعا سيلم حسن ما كانش يفوت فرصة زي دي. سافر باريس و اخد دبلومة فى اللغة الشرقية و دبلومة تانية فى الديانات و دبلومة تالتة فى اللغة الشرقية برضه و رجع مصر سنة 1927.

اتعين تاني فى المتحف المصري بس ما استمرش كتير هناك..كلية الاداب بالجامعة المصرية طلبته علشان يشتغل مدرس فيها و اترقي لغاية ما وصل لدرجة الاستاذية و كان مشرف علي حفاءر الجامعة بمنطقة اهرامات الجيزة.

استمر رغم كل ده فى دراساته و اخد درجة الدكتوراة من جامعة فيينا سنة 1935.

سليم حسن كان مصري جدا و غيور جدا علي مصريته و هو اول مصري يشتغل فى منصب وكيل مصلحة الاثار المصرية ..و دي ليها قصة مهمة. انه اخد من الملك فاروق مجموعة من قطع الاثار المصرية اللى استولي عليها ابوه الملك فؤاد و حاول كتير الملك فاروق انه ياخدها تاني الا ان سيلم حسن رفض و ده كان من الاسباب المهمة اللى خلت سليم حسن ما يقعدش كتير فى منصبه ده.

الناس كلها عارفة سليم حسن بموسوعته القيمة جدا "تاريخ مصر القديمة" اللى اتنشرت فى 16 جزء بداية من سنة 1940 لغاية سنة 1960 و ده يعتبر اكبر عمل تاريخي اتعمل عن التاريخ المصري.

سليم حسن, ابن مصر الطيب, المصري جدا, مات فى 29 سبتمبر سنة 1961.
   
ألبوم الصور